साउदी अरबमाथि हुने हुथी आक्रमणको निन्दा गर्दै एर्दोगानद्वारा रियादलाई पूर्ण समर्थनको प्रतिवद्धता

टर्कीका राष्ट्रपति रेसेप तैयप एर्दोगानले साउदी अरबमाथि यमनको हुथी विद्रोही समूहले गरेको आक्रमणको कडा निन्दा गरेका छन् । साउदी युवराज तथा प्रधानमन्त्री मोहम्मद बिन सलमानसँग मङ्गलबार भएको टेलिफोन संवादका क्रममा राष्ट्रपति एर्दोगानले साउदी अरबको सुरक्षा र अखण्डताप्रति टर्कीको पूर्ण समर्थन रहेको पुनः दोहो¥याएका हुन् । टर्कीको राष्ट्रपतिको सञ्चार निर्देशनालयकाअनुसार दुई नेताबीच पछिल्लो समय मध्य–पूर्वमा देखिएको सुरक्षा चुनौती र साउदी भूमिमा भइरहेका आक्रमणका घटनाबारे विस्तृत छलफल भएको छ। विशेषगरी गत शनिवार रियादस्थित अन्तर्राष्ट्रिय विमानस्थललाई लक्षित गरी गरिएको घातक प्रहारले यस क्षेत्रको सुरक्षा अवस्था गम्भीर बनाएको छ । साउदी नागरिक उड्डयन प्राधिकरणकाअनुसार रियाद विमानस्थलमा भएको उक्त आक्रमणमा १२ जनाको मृत्यु भएको छ भने ३०९ जना घाइते भएका छन् । हुथी विद्रोहीहरूले पछिल्ला दिनहरूमा रियादलाई केन्द्रित गरी आफ्नो आक्रमणलाई तिब्र पारेपछि क्षेत्रीय शक्तिहरू चिन्तित बनेका छन् । टर्की र साउदी अरबबीच गत अगस्टमा मक्का संयुक्त रक्षा सम्झौतामा हस्ताक्षर भएको थियो । सोही सम्झौताको जगमा उभिएर अक्टोबर ५ मा दुवै राष्ट्रले हुथी विद्रोहीको आक्रमण रोक्न र साउदी सुरक्षा सुदृढ गर्न आवश्यक सैन्य जनशक्ति तथा स्रोतसाधन तैनाथ गर्ने योजना सार्वजनिक गरेका थिए । यसै सन्दर्भमा राष्ट्रपति एर्दोगानको पछिल्लो अभिव्यक्तिले क्षेत्रीय सुरक्षा व्यवस्थालाई थप बलियो बनाउने संकेत गरेको छ। विज्ञहरूकाअनुसार टर्कीको यो सक्रियताले क्षेत्रीय कुटनीतिमा नयाँ समीकरणको संकेत गरेको छ । विशेषगरी साउदी अरब र पाकिस्तानसँगको त्रिपक्षीय सुरक्षा साझेदारीले हुथी विद्रोहीविरुद्धको साउदी प्रयासलाई रणनीतिक बल प्रदान गर्ने विश्वास गरिएको छ ।