रुस–युक्रेन द्वन्द्वको असर काला सागरमा फैलिन नदिन एर्दोगानको चेतावनी

टर्कीका राष्ट्रपति रेसेप तैयप एर्दोगानले युक्रेन र रुसबीचको जारी द्वन्द्व काला सागरतर्फ फैलिँदै गएकोमा गम्भीर चिन्ता व्यक्त गर्नुभएको छ । इस्तानबुलमा युक्रेनी राष्ट्रपति भोलोडिमिर जेलेन्स्कीसँगको द्विपक्षीय वार्ता पछि आयोजित पत्रकार सम्मेलनमा उनले सर्वसाधारण चल्ने पानीजहाजमाथि भइरहेका आक्रमणहरू पूर्णतया अस्वीकार्य रहेको बताउनुभएको हो । राष्ट्रपति एर्दोगानले तनाव बढाउने कुनैपनि कार्य कसैको हितमा नहुने भन्दै संयमता अपनाउन दुवै पक्षलाई आग्रह गर्नुभयो ।
टर्कीले यसअघि मस्को र किएभबीच आयोजना गरेको शान्ति वार्ताको स्मरण गर्दै उहाँले कूटनीतिक माध्यमबाट नै समस्याको समाधान खोज्न सकिनेमा जोड दिनुभयो । उता, युक्रेनी राष्ट्रपति जेलेन्स्कीले काला सागर अनाज करिडोरलाई सुचारु राख्न टर्कीसँग सहकार्य गर्ने सहमति भएको जानकारी दिनुभयो । सन् २०२२ को जुलाईमा संयुक्त राष्ट्रसंघ र टर्कीको मध्यस्थतामा भएको ‘ब्ल्याक सी ग्रेन इनिसिएटिभ’ ले युक्रेनी बन्दरगाहबाट विश्वभर खाद्य र मलको आपूर्ति सुनिश्चित गर्दै आएको छ । यसका अतिरिक्त दुई देशबीचको आर्थिक सम्बन्धलाई थप सुदृढ बनाउने विषयमा पनि छलफल भएको छ । सन् २०२६ अक्टोबर १ देखि पूर्ण रूपमा कार्यान्वयनमा आएको स्वतन्त्र व्यापार सम्झौतामार्फत नयाँ औद्योगिक र आर्थिक परियोजनाहरू अघि बढाउने दुवै राष्ट्रको तयारी छ ।