ब्राजिलका राष्ट्रपति लुइज इनासियो लुला दा सिल्भाले राष्ट्रपतीय निर्वाचनमा पराजित उम्मेदवार फ्लाभियो बोल्सोनारोले देश छाडेको भन्ने खबरप्रति आलोचना गर्दै त्यसलाई ‘लज्जास्पद’ बताउनुभएको छ । मंगलवार राजधानी ब्रासिलियास्थित राष्ट्रपति निवास अल्भोराडा प्यालेस बाहिर आफ्नो ८१ औँ जन्मदिन मनाउन भेला भएका समर्थकहरूलाई सम्बोधन गर्दै लुलाले बोल्सोनारोको देश छाड्ने निर्णयप्रति दुःख व्यक्त गर्नुभएको हो । लिबरल पार्टीका संघीय सांसद माउरिसियो मार्कोनले मंगलवार फ्लाभियो बोल्सोनारो ब्राजिल छाडेर अमेरिका जाँदै गरेको बताएका थिए । तर बोल्सोनारोले देश छाडेको विषयमा आधिकारिक पुष्टि भएको छैन । ब्राजिलको सर्वोच्च संघीय अदालतले सोमवार बोल्सोनारोलाई देश छाड्न रोक लगाएको थियो । ब्राजिलका सञ्चारमाध्यमका अनुसार अदालतको आदेश सम्पती शुद्धीकरणसम्बन्धी अनुसन्धानसँग सम्बन्धित छ । उक्त अनुसन्धानमा बोल्सोनारो र कानून व्यवसायी विलर टोमाजमाथि पनि अनुसन्धान भइरहेको छ । ब्राजिलका सञ्चारमाध्यमले अध्यागमन नियन्त्रण प्रणालीमा बोल्सोनारोले नियमित सीमा जाँच प्रक्रिया पूरा गरेर देश छाडेको अभिलेख नरहेको जनाएका छन् । उनी देशबाट कसरी बाहिरिए वा बाहिरिएका हुन् कि होइनन् भन्ने विषयमा संघीय प्रहरीले अनुसन्धान गरिरहेको छ । आइतबार सम्पन्न राष्ट्रपतीय निर्वाचनको दोस्रो चरणमा लुलाले ५१.७९ प्रतिशत मत प्राप्त गर्दै फ्लाभियो बोल्सोनारोलाई पराजित गरेका थिए । बोल्सोनारोले ४८.२१ प्रतिशत मत प्राप्त गरेका थिए ।
This website uses cookies.