काठमाडौं, २८ माघ । समाज कल्याण परिषद्मा रिक्त रहेको निर्देशक पदपूर्तिका लागि कायम मुकायम (कामु) तोकेकाहरु दुई वर्ष बित्दा समेत सोही हैसियतमा काम गर्न बाध्य पारिएको छ । परिषद्का ४ जना कामु निर्देशकलाई कानुनी प्रावधान मिच्दै पुरानै जिम्मेवारी तोकिएको छ ।
नियमानुसार, कामु तोकिएको दिनदेखि ६ महिनासम्म मात्रै कामु दिने व्यवस्था भए पनि सो व्यवस्थाको सरासर उल्लंघन गरिएको छ । उपनिर्देशकहरु हरि तिवारी, प्रल्लाद पन्त, भगवती संग्रौला र शिव बस्नेत साढे २ वर्षदेखि कामु निर्देशकको जिम्मेवारीमा रहेका छन् ।
कामु निर्देशक हरि तिवारीले नियमानुसार नै चार उपनिर्देशकलाई कामु दिएको दाबी गरे । चार उपनिर्देशकको कामुमा बढुवा नियमअनुसार नै भएको हो । परिषद् एक स्वायत्त संस्था भएकाले निजामतीभन्दा भिन्न नियमले चल्ने गरेको उहाँले दाबी गरे ।
उहाँका अनुसार परिषद्मा लामो समयसम्म पदपूर्ति र बढुवा नभएकोमा समाज कल्याण परिषद् कर्मचारी सेवा सर्त नियमावली, २०५० ले जेष्ठताको आधारमा कामु नियुक्त गरेको हो ।
यो खबर आजको नेपाल समाचारपत्र दैनिकमा प्रकाशित छ ।
