किशन भण्डारी
काठमाडौं, २१ माघ ।
तीन बर्ष अघि काठमाडौंको मुलपानीमा अन्तर्राष्ट्रिय क्रिकेट रंगशाला निर्माण गर्न सुरु गरिएको थियो । तर, एक बर्ष अघि नै निर्माण सकिनुपर्ने उक्त रंगशालाको आधारभूत कामसमेत सकिएको छैन ।
काठमाडौंको मुलपानीमा २०७१ साल माघ १९ गतेबाट निर्माण सुरु गरिएको अन्तर्राष्ट्रिय क्रिकेट रंगशाला २०७३ असार मसान्तमा सक्ने गरि ठेक्का सम्झौता भएको थियो । तर, २०७४ साल सकिन लाग्दासमेत रंगशालाको आधारभुत कामसमेत पुरा हुन सकेको छैन । आयोजनास्थलमा तीब्ररुपमा काम भइरहेको राखेपको दावी गरे पनि स्थलगत अवलोकनमा जाँदा निर्माणधिन क्षेत्रमा कामदारसमेत देख्न मुस्कील छ । र प्रभावकारी निर्माण भएकोे अनुभुती गर्न सकिँदैन ।
निर्माण सम्पन्न भएको भनिएको प्याराफिटको अवस्थासमेत नाजुक देखिन्छ । यस रंगशाला निर्माणका लागि सरकारले १४ करोड ६३ लाख रुपैयाँ बजेट विनियोजन गरेको थियो । तोकिएको समय भित्र निर्माण सम्पन्न नभएपछि ६ महिना समय थप गरिएको थियो । तर थपिएकोबाहेक अर्काे ६ महिना बिती सक्दा पनि मैदानमा कुनै परिवर्तन आएको छैन । २० वर्ष देखि चर्चामा रहेको मुलपानीको खाली मैदानलाई अन्तर्राष्ट्रिय स्तरको प्याराफिटसहितको क्रिकेट मैदान बनाउन सुरु त भयो तर सम्पन्न हुन भने कति समय लाग्ने भन्न सक्ने अवस्था छैन । हालसम्म निर्माण भएको संरचनासमेत कमजोर बन्दै गएपछि खेलाडीहरु चिन्तीत देखिएका छन् ।
जग्गा धनिले मुआब्जा नपाएका कारण निर्माणमा ढिलाई भएको राष्ट्रिय खेलकुद परिषदको भनाई छ । मुआब्जा विवाद सल्टाएर एक वर्ष भित्र निर्माण सक्ने परिषदको दाबी छ । राम्रो सम्भावना बोकेको क्रिकेट खेललाई व्यवस्थित र व्यवसायीक बनाउन सरकारी तवरबाट पहल हुन जरुरी छ । त्यसका लागि सरकारले समयमै भैतिकपूर्वाधार निर्माण ध्यान दिन आवश्यक छ ।
