बागलुङ । बागलुङमा कारोना संक्रमण दर ह्वातै बढ्दै गएपछि निषेधाज्ञालाई कडाई गरिएको छ । आज जिल्ला प्रशासन कार्यालय बागलु्ङमा बसेको जिल्ला कोभिड–१९ संकट व्यवस्थापन केन्द्रको मंगलबार बैठकले जिल्लामा समुदायमा संक्रमय फैलिएको र संक्रिय संक्रमितको संख्यमा अत्यधिक वृद्धि भएकोले जिल्लाभर निषेधाज्ञा कडा पारिने निर्णय गरेको हो ।
बैठकले साउन २८ गते बिहान ५ बजेदेखि भदौ ५ गते राति १२ बजेसम्म जिल्ला भर निषेधाज्ञा थप कडाइका साथलागू गर्ने निर्णय गरेको निमित्त प्रमुख जिल्लाअधिकारी गणेश गौतमले जानकारी दिए ।
निषेधाज्ञाको समयमा सरकारी र गैर सरकारी कार्यालयहरु, बैंक, सहकारी, विमा तथा वित्तिय संस्था, शैक्षिक संस्थाहरु र अति आवश्यक बाहेकका सार्वजनिक तथा निजी यातायात बन्द गरिने भएको छ ।
बैठकले खाद्यान्न पसल आइतबार, बुधबार र शुक्रबार बिहान १० बजेसम्म सञ्चालन गर्न दिने, लोकसेवा तथा टियूका परीक्षाका लागि समन्वय गरी सञ्चालन गर्न दिने र औषधिजन्य पसल सञ्चालनमा रोक नलगाउने निर्णय गरेको छ ।
स्वास्थ्य कार्यालयको पछिल्लो आँकडा अनुसार मंगलबारसम्म जिल्लामा सक्रिय सङ्क्रमितको सङ्ख्या ६ सय ३० जना पुगेको छ । कार्यालयका कोभिड–१९ स्रोत व्यक्ति देव प्रकाश घिमिरेले मंगलबार ४५ जना नयाँ सङ्क्रमित फेला परेको जानकारी दिए ।
