काठमाडौं, १० चैत । संचार तथा सूचना प्रविधिमन्त्री गोकुल बास्कोटाले हतियार बिसाएर आएमात्रै नेत्रविक्रम चन्द नेतृत्वको नेपाल कम्युनिष्ट पार्टीसँग सरकारले वार्ता गर्ने दोहोर्याएका छन् । सरकारका प्रवक्ता समेत रहेका मन्त्री बास्कोटाले बमसँगै राखेर चन्द नेतृत्वको नेकपासँग वार्ताको कल्पना गर्न नसकिने स्पष्ट पारे ।
नेपाल प्रेस इन्स्टिच्यूटले आईतबार काठमाडौंमा आयोजना गरेको एक कार्यक्रममा उनले बम, बारुद बोकेर आतंक फैल्याईरहेको चन्द नेतृत्वको नेकपाको पक्षमा समाचार सम्प्रेषण गरिएको भन्दै संचार माध्यामहरुप्रति पनि आक्रोश व्यक्त गरे । मन्त्री बास्कोटाले राष्ट्रिय हितमा केन्द्रित भएर मर्यादित पत्रकारिता गर्न संचार माध्यामलाई आग्रह गरे ।
मन्त्री बास्कोटाले संचार माध्यामहरुले स्वतन्त्रताको उपयोग गर्ने नाममा अराजकता फैल्याउने गतिविधिलाई प्राथमिकता दिन नहुने बताए ।
