काठमाडौं, १४ भदौ । निर्वाचन क्षेत्र निर्धारण आयोगले आज प्रधानमन्त्री शेरबहादुर देउवासमक्ष प्रतिवेदन बुझाएको छ । आयोगका अध्यक्ष कमलनारायण दास नेतृत्वको टोली प्रधानमन्त्री निवास बालुवाटार पुगि प्रतिवेदन बुझाएको हो ।
सरकारले प्रदेशसभा र प्रतिनिधि सभाको निर्वाचन मंसिर १० र २१ गते दुई चरणमा गर्ने निर्णय गरेको छ । आयोगले प्रतिवेदन बुझाएसँगै अब निर्वाचन आयोगलाई चुनावको तयारीमा जुट्न सजिलो भएको छ ।
निर्वाचन क्षेत्र निर्धारण आयोगले भुगोल र जनसंख्यालाई आधार मानेर क्षेत्र निर्धारण गरेको हो । आयोगले प्रतिनिधिसभाका लागि १ सय ६५ र प्रदेशसभाका लागि ३ सय ३० वटा निर्वाचन क्षेत्र निर्धारण गरेको छ ।
