काठमाडौं, १५ चैत । अनुसन्धानकर्ताहरुले नेपालमा जलवायु परिवर्तनका कारण मानव स्वास्थ्य जटिल बन्दै गएको चेतावनी दिएका छन् ।
जलवायु परिवर्तनकै कारण एक वर्ष अघि जाजरकोट लगायतका जिल्लाहरुमा झाडा पखालाको महामारी फैलिएको पनि विभिन्न अध्ययन, अनुसन्धानले देखाएको छ ।
नेपाल स्वास्थ्य अनुसन्धान परिषदका वरिष्ठ अनुसन्धान अधिकृत डा. मेघनाथ धिमालले जलवायु परिवर्तनकै कारण जाजरकोटमा एक वर्ष अघि झाडा पखालाको महामारी फैलिएको बताए ।
बिहीबारबाट ललितपुरमा सुरु भएको जलवायु परिवर्तन तथा स्वास्थ्य सम्मेलनमा बोल्दै उनले जलवायु परिवर्तनकै कारण हिमाली भेगमा पनि मलेरिया जस्ता लामखुट्टेबाट सर्ने रोगहरु समेत भेटिएको बताए ।
वरिष्ठ अनुसन्धान अधिकृत धिमालले जलवायु परिवर्तनबाट मानव स्वास्थ्यमा हुने जोखिम न्यूनिकरणका लागि सरकारले राष्ट्रिय अनुकूलन कार्यक्रम नै तय गरेको उनको भनाई छ ।
सरकारले जलवायु परिवर्तनबाट स्वास्थ्य जोखिमलाई सम्बोधन गर्न विभिन्न जनचेतनामूलक कार्यक्रम पनि संचालन गर्दै आएको छ ।
