एजेन्सी, २२ माघ । इङ्लिस प्रिमियर लिग फुटवलमा लिभरपुल र टोटनह्याम बराबरीमा रोकिएको छ ।
गएराति भएको खेलमा अंक तालिकाको तेस्रो स्थानमा रहेको लिभरपुललाई पाँचौं स्थानको टोटनह्यामले बराबरीमा रोकेको छ । लिभरपुल २ पटक लिएको अग्रता जोगाउन नसक्दा अंक बाँड्न बाध्य भएको हो । खेलको तेस्रो मिनेटमा मोहम्मद सलाहको गोलमा अग्रता लिएको लिभरपुलले अन्तिम १० मिनेट टोटनह्यामलाई रोक्न सकेन ।
८० औं मिनेटमा टोटेनह्यामले बराबरी गोल फर्कायो । इन्जुरी समयको पहिलो मिनेटमा सलाहले नै लिभरपुलका लागि दोस्रो गोल गरे । तर सलाहको दोस्रो गोल पनि निर्णायक बन्न सकेन । इन्जुरी समयको पाँचौं मिनेटमा टोटेनह्यामले पेनाल्टी पायो र पेनाल्टीको अवसरलाई सदुपयोग गर्दै ह्यारी केनले बराबरी गोल फर्काए । ह्यारी केनको प्रिमियर लिगमा यो सयौं गोल हो ।
बराबरीपछि तेस्रो स्थानको लिभरपुलको ५१ अंक भएको छ भने पाँचौं स्थानको टोटेनह्यामको ४९ अंक भएको छ । गएराति नै भएको खेलमा क्रिष्टल प्यालेसले न्युक्यासललाई १–१ को बराबरीमा रोकेको छ ।
