राष्ट्रिय सभा निर्वाचनका लागि सुदूरपश्चिममा उम्मेदवारी दर्ता

काठमाडौं, २३ पुस ||
राष्ट्रिय सभा निर्वाचनका लागि सुदूरपश्चिम प्रदेशमा सत्तारुढ गठबन्धनका नेपाली काँग्रेस, नेकपा (माओवादी केन्द्र) र नेकपा एमालेका उम्मेदवारले उम्मेदवारी दर्ता गराएका छन् । आगामी माघ ११ गते हुने राष्ट्रिय सभा निर्वाचनका लागी सुदूरपश्चिमबाट उम्मेदवार बनेकाहरूले आज सोमवार उम्मेदवारी दर्ता गराएका हुन् । धनगढीस्थित निर्वाचन आयोगको प्रदेश निर्वाचन कार्यालय धनगढीमा सत्तारुढ गठबन्धन र एमालेका उम्मेदवारको उम्मेदवारी दर्ता गरिएको हो । निर्वाचन कार्यालयका निमित्त प्रमुख प्रेमराज भट्टकाअनुसार सत्तारुढ गठबन्धनबाट काँग्रेसले अन्यबाट कञ्चनपुरका बलदेव बोहरा र अपाङ्ग तथा अल्पसंख्यक कैलाली काँग्रेसका सभापति नारायणदत्त भट्टले उम्मेदवारी दर्ता गराउनुभएको छ । बोहरा काँग्रेसका कञ्चनपुर सभापति, जिल्ला विकास समितिका सभापति र संविधान सभा सदस्य पनि भइसक्नुभएको छ । यस्तै, कैलालीका भट्ट दोस्रो जनआन्दोलनबाट घाइते भएर शारीरिक अशक्त हुनुभएको थियो । सत्ता गठबन्धनबाटै महिलाबाट माओवादी केन्द्रका रेनु चन्दले उम्मेदवारी दर्ता गर्नुभएको छ । चन्द २०६४ सालको संविधान सभा सदस्य हुनुहुन्छ । एमालेबाट अन्यबाट कञ्चनपुरका ईश्वरीप्रसाद खरेल, महिलाबाट कैलालीकी सावित्री घिमिरे र अपाङ्ग तथा अल्पसङ्ख्यक कैलालीकै रामचन्द्र जोशीलाई उम्मेदवारी दर्ता गराउनु भयो । खरेल केन्द्रिय लेखा आयोग सदस्य हुनुहुन्छ भने घिमिरे अनेमसङ्घ कैलालीकी पूर्वअध्यक्ष हुनुहुन्छ । जोशी एमालेको भ्रातृ सङ्गठन अपाङ्ग सङ्घका केन्द्रिय सदस्य हुनुहुन्छ । सुदूरपश्चिमबाट राष्ट्रिय सभा सदस्यका सदस्यहरू नेकपा (माओवादी केन्द्र) का हरिराम चौधरी उत्सव र महेश महरा तथा नेकपा (एमाले) का इन्दु कडरियाको पदावधि सकिन लागेको हो । माघ ११ गते बिहीवारका दिन हुने राष्ट्रिय सभा सदस्य निर्वाचनका लागि स्वीकृत निर्वाचन कार्यक्रमअनुसार आइतबार सात वटै प्रदेशको निर्वाचन अधिकृतको कार्यालयमा अन्तिम मतदाता नामावली प्रकाशन गरिएको थियो । सुदूरपश्चिम प्रदेशमा प्रदेश सभा सदस्यतर्फको मतदाता सङ्ख्या ५२ तथा गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख तर्फको मतदाता सङ्ख्या १७६ गरी जम्मा २२८ जना मतदाता कायम भएका छन् ।