काठमाडौं । संघीय समाजवादी फोरमका अध्यक्ष उपेन्द्र यादवले स्थानीय तहको दोस्रो चरणको निर्वाचनमा मधेस केन्द्रित दलहरुले साझा उम्मेदवार बनाउनुपर्ने बताउनु भएको छ ।
यादवले मधेशी जनताको अधिकार प्राप्त गर्न पनि मधेशी मोर्चा एकतावद्ध भएर दोस्रो चरणको निर्वाचनमा जानुपर्ने आवश्यक्ता औल्याउनु भयो ।
आईतबार जनकपुरमा संचारकर्मीसँग कुरा गर्दै उहाँले मधेश विरोधी शक्तिलाई पराजित गर्न पनि मधेश केन्द्रित दलहरुले स्थानीय तहको निर्वाचनमा साझा उम्मेदवार बनाउनुपर्ने उल्लेख गर्नु भयो । उहाँले मधेसका सबै दलहरुले स्थानीय तहको दोस्रो चरणको निर्वाचनमा भाग लिने विश्वास पनि व्यक्त गर्नु भयो ।
यादवले प्राप्त उपलब्धिलाई संस्थागत गर्न र थप उपलब्धि प्राप्त गर्न पनि आफनो पार्टीले स्थानीय तहको निर्वाचनमा भाग लिने नीति लिएको पनि स्पष्ट पार्नु भयो ।
उहाँले स्थानीय तहको निर्वाचनलाई मधेशको अधिकार प्राप्तीको आन्दोलनको कडीको रुपमा लिइएको दावी समेत गर्नु भयो ।
अध्यक्ष यादवले मधेश केन्द्रित दलहरु सशक्त नभए मधेशको माग सम्बोधन नहुने पनि उल्लेख गर्नु भयो ।
