काठमाडौं । बागमती प्रदेश क्रिकेट संघको अध्यक्षमा निर्वाचित भएपछि नेपाली राष्ट्रिय क्रिकेट टोलीका पूर्व कप्तान पारस खड्कालाई नेकपा एमालेका अध्यक्ष केपी शर्मा ओलीले बधाई दिएका छन् ।
ललितपुरको धोबिघाटस्थित एक होटलमा शुक्रवार प्रादेशिक क्रिकेट संघ वागमती प्रदेशको दोस्रो साधारण सभा तथा निर्वाचनले नयाँ नेतृत्व चयन गरेको हो ।
आज भएको निर्वाचनमा प्रतिस्पर्धी उमेश पियालाई भारी मतले हराउँदै खड्का अध्यक्षमा निर्वाचित भएका हुन् ।
वागमती प्रदेशमा कुल ३७ मत मध्य खड्काले २३ मत ल्याउँदा पियाले १४ मत मात्र प्राप्त गरेका छन् ।
अध्यक्षमा निर्वाचित भएपछि ओलीले सामाजिक सञ्जालमा लेखेका छन्– पारस खड्कासँग कहिलेकाहीं कुरा हुँदा क्रिकेट खेलको सफलताका लागि यसको व्यवस्थापन वा प्रशासनिक पक्षको सुधार गर्नु पर्ने कुरा हुन्थ्यो। आज मैले सुनें – उहाँ बागमती प्रदेश क्रिकेट संघको अध्यक्षमा निर्वाचित हुनु भएको छ। उहाँ पहिला क्रिकेट मैदानको क्याप्टेन, अब क्रिकेट प्रशासनको क्याप्टेन ।
बधाई छ क्याप्टेन पारस !
