काठमाडौं, १८ वैशाख । प्रेमीको घरमा शनिबार मृत अवस्थामा भेटिएकी वीर अस्पतालकी नर्स अनुमा श्रेष्ठको परिवारले आत्महत्या दुरुत्साहनमा मुद्दा दर्ता गराएका छन् ।
अनुमाका प्रेमी भनिएका सुजन ढकाल र उनका बुवाविरुद्ध आत्महत्या दुरुत्साहनमा जाहेरी दिएका हुन् । पटकपटक शारिरीक सम्बन्ध भई २ पटकसम्म गर्भपतन गरिएको र विवाह गर्न अस्वीकार गरी आत्महत्या गर्न बाध्य बनाएको भन्दै ढकालको बावुछोराविरुद्ध प्रहरी वृत्त बालाजुमा जाहेरी दर्ता गरेको पारिवारिक स्रोतले जनाएको छ ।
केटापक्षले विवाह गर्न अस्वीकार गरेको युवती पक्षको आरोप छ । ३४ वर्षीय नर्स श्रेष्ठ ढकालको घरमा आत्महत्या गरेको अवस्थामा शनिबार भेटिएकी थिइन । शनिबार अपरान्ह ४ बजे चितवनकी अनुमाले आत्महत्या गरिसकेको अवस्थामा ढकाल परिवारले प्रहरीलाई खबर गरेको थियो । अनुमाका परिवार शनिबार राति नै काठमाडौं आइपुगेपछि मुचुल्का तयार पारी शव उठाइएको छ ।
प्रेमी सुजनका बुवाले छोराको विहे अनुमासँग गर्न अस्वीकार गरेपछि उनकै घरमा पुगेर आत्महत्या गरेको हुन सक्ने युवती पक्षको दाबी छ । अनुमा वीर अस्पतालमा काम गर्थिन् भने ढकाल कान्ति बाल अस्पतालमा कार्यरत थिए । अनुमा सोह्खट्टुेमा डेरा लिएर बस्दै आएकी थिइन् ।
उनले आत्महत्या गरेको स्थानमा ‘सुसाइड डायरी’ पनि भेटिएको थियो । डायरीमा आफ्नो जीवनको भोगाई,प्रेमसम्बन्ध, विवाहको लागि गरेको प्रयास र केटा पक्षले गरेको अस्वीकारबारे उल्लेख भएको परिवारिक स्रोतले जनाएको छ । यस अघि पनि अनुमाले आत्महत्याको प्रयास गरेकी थिइन् ।
