एजेन्सी, १२ कार्तिक । इंग्लिस क्लब लिभरपुलले च्याम्पियन्स लिग फुटबलको समूह चरणमा लगातार दोस्रो जित निकालेको छ ।
मंगलबार राति भएको खेलमा डेनिस क्लब एफसी मिद्त्जील्यान्डलाई २–० गोल अन्तरले पराजित गर्दै लिभरपुलले लगातार दोस्रो जित निकालेको हो ।
घरेलु मैदानमा लिभरपुललाई जित दिलाउन डिएगो जोटा र मोहमद सलाहले १-१ गोल गरे । पहिलो हाफ गोलरहित बराबरीमा सकिएको खेलको दोस्रो हाफमा लिभरपुलले दुबै गोल गरेको थियो । खेलको ५५ औं मिनेटमा जोटाले गोल गर्दै लिभरपुललाई १–० को अग्रता दिलाएका थिए ।
त्यसपछि खेलको इन्जुरी समयमा सलाहले पेनाल्टीमा गोल गर्दै लिभरपुललाई २–० को जित दिलाए । लगातार दोस्रो जित निकालेको लिभरपुल ६ अंक शीर्ष स्थानमा समेत उक्लिएको छ ।