ला लिगाको उपाधि भिडन्त रोचक मोडमा, बार्सिलोना र रियलको अंक बराबरी

  • ला लिगाको उपाधि भिडन्त रोचक मोडमा, बार्सिलोना र रियलको अंक बराबरी

काठमाडौं । स्पेनिस ला लिगा फुटबलको उपाधि होड निकै रोमाञ्चक बन्दै गएको छ ।

लिग अन्तर्गत शनिबार राति भएको खेलमा जित निकाल्दै बार्सिलोना शीर्ष स्थानमा कायम रहन सफल भएको छ । उपाधि होडमा बार्सिलोना र रियल मड्रिडले एक अर्कालाई दबाब दिँदै आएका छन् ।

अवे मैदानमा भएको खेलमा बार्सिलोनाले स्पानियोललाई ३–० ले हरायो । बार्सिलोनालाई जिताउन लुइस स्वारेजले दुई तथा इभान रेकिटिकले एक गोल गरे ।

पहिलो हाफमा गोल रहित बराबरीमा रोकिएको बार्सिलोनाले दोस्रो हाफमा तीन गोल ग¥यो । ५० औं मिनेटमा स्वारेजले गोल गर्दै बार्सिलोनालाई अग्रता दिलाए । ७६ औं मिनेटमा रेकिटिकले बार्सिलोनाको अग्रता दोब्बर पारे ।

८७ औं मिनेटमा स्वारेजले व्यक्तिगत दोस्रो गोल गरेपछि बार्सिलोना ३–० ले विजयी भयो ।

यता लिग अन्तर्गत शनिबार राति भएको खेलमा भ्यालेन्सियालाई २–१ ले हराउँदै रियल मड्रिडले उपाधि होडमा आफूलाई एक कदम अघि सारेको छ ।

घरेलु मैदानमा भएको खेलमा रियललाई जिताउन क्रिष्टियानो रोनाल्डो र मार्सेलोले गोल गरे । भ्यालेन्सियाका लागि पारेजोले एक गोल फर्काए । २७ औं मिनेटमा रोनाल्डोले गोल गर्दै रियल मड्रिडलाई पहिलो हाफमा १–० को अग्रता दिलाए ।

८२ औं मिनेटमा पारेजोले भ्यालेन्सियाका लागि बराबरी गोल फर्काए । तर त्यसको चार मिनेटपछि मार्सेलोले रियल मड्रिडका लागि विजयी गोल गरे र उपाधि होडमा बलियो बनाए ।

जितपछि दोस्रो स्थानको रियल मड्रिडको ३४ खेलबाट ८१ अंक भएको छ । स्पानियोललाई हराएको शीर्ष स्थानको बार्सिलोनाको पनि ८१ अंक नै छ ।

तर उसले एक खेल बढी खेलेको छ । रियल मड्रिडले अब लिगमा चार खेल खेल्न बाँकी छ । रियल मड्रिडले ग्रनाडा, सेभिल्ला, मालागा तथा सेल्टा डी भिगोसँग खेल्न बाँकी छ ।

 

By: रामचन्द्र अर्याल

4 weeks ago | खेलकुद

कृपया तपाईको प्रतिकृया यहाँ दिनुहोला!

Top News